काठमाडौं । लामो समयदेखि रोकिएको स्मार्ट चिपयुक्त चालक अनुमतिपत्र (लाइसेन्स) छपाई प्रक्रिया फेरि पनि पुरानै ढर्रामा फर्किने संकेत देखिएको छ । यातायात व्यवस्था विभागले आवश्यक चिप नआउँदा चिपविनाको लाइसेन्स वितरण गर्ने तयारी गरेको हो । विभागका अनुसार भारतबाट अर्डर गरिएको चिप लामो समयसम्म नआएपछि सेवा अवरुद्ध हुने अवस्थालाई टार्नका लागि अस्थायी रूपमा पुरानै कार्डमा लाइसेन्स छपाइने तयारी भइरहेको छ । यसअघि पनि विभागले चिप अभावकै कारण साधारण PVC कार्डमा प्रिन्ट गरिएको लाइसेन्स वितरण गरेको थियो । विभागका महानिर्देशकले भने, “सेवा दिन नसक्ने अवस्थाभन्दा पनि पुरानै कार्डमा छपाई गरेर चालकहरूलाई लाइसेन्स उपलब्ध गराउने निर्णय गर्न लागिएको हो।” तर यातायात विशेषज्ञहरूका अनुसार यो निर्णयले डिजिटल प्रणालीमा फर्किने प्रयासलाई पछि धकेल्ने खतरा छ । उनीहरूले दीर्घकालीन समाधानको लागि स्थानीय स्तरमै चिप उत्पादन वा वैकल्पिक प्रविधिको विकास गर्न सुझाव दिएका छन् । हाल देशभर करिब दुई लाखभन्दा बढी चालकले लाइसेन्सको प्रतीक्षा गरिरहेका छन् ।
