जापानमा सम्पन्न मध्यावधि निर्वाचनमा प्रधानमन्त्री सनाए तकाइचीको नेतृत्वमा रहेको सत्ताधारी दलले दुई तिहाइ बहुमतसहित जित हासिल गर्ने निश्चित देखिएको छ। प्रारम्भिक तथा अधिकांश मतगणनाको नतिजाअनुसार सत्तारुढ गठबन्धनले प्रतिनिधिसभामा स्पष्ट अग्रता कायम गर्दै आवश्यक दुई तिहाइ सिट सुरक्षित गरेको हो। तकाइचीको लिबरल डेमोक्र्याटिक पार्टी, एलडीपीले जापानी प्रतिनिधिसभाका ४६५ मध्ये ३५२ सिट जित्ने देखिएको सरकारी प्रसारक एनएचकेले जनाएको छ। चुनावी नजिता औपचारिक रूपमा घोषणा हुन बाँकी छ। बहुमतका लागि आवश्यक पर्ने ३१६ सिट एलडीपी एक्लैले जित्ने देखिएको छ। त्यो सङ्ख्या प्रतिनिधिसभाको ६८ प्रतिशत अर्थात् दुईतिहाइ हो।
निर्वाचन आयोगका अनुसार मतगणना अन्तिम चरणमा पुगेको छ र बाँकी सिटहरूमा पनि सत्ताधारी दलकै उम्मेदवारहरू अगाडि छन्। यससँगै प्रधानमन्त्री तकाइचीको राजनीतिक नेतृत्व थप सुदृढ भएको छ भने सरकारलाई नीतिगत निर्णय र कानुनी सुधार अघि बढाउन सहज अवस्था बनेको विश्लेषकहरूले बताएका छन्। प्रधानमन्त्री तकाइचीले चुनावी अभियानमा आर्थिक स्थायित्व, जीवनयापन लागत नियन्त्रण, राष्ट्रिय सुरक्षा सुदृढीकरण, प्रविधि तथा उद्योगमा लगानी, र सामाजिक सुरक्षा प्रणाली सुधारलाई मुख्य एजेन्डा बनाएकी थिइन्। विशेषतः रोजगारी सिर्जना, वृद्ध जनसंख्याका चुनौती समाधान र महिला सहभागिता बढाउने प्रतिबद्धताले मतदाताको व्यापक समर्थन पाएको बताइएको छ।
नतिजा सार्वजनिक भएपछि प्रधानमन्त्री तकाइचीले राष्ट्रका नाममा सम्बोधन गर्दै जनताको विश्वासप्रति आभार व्यक्त गरिन्। “यो जनादेश स्थिर सरकार, बलियो अर्थतन्त्र र सुरक्षित जापानका लागि हो,” उनले भनिन्। उनले प्राप्त बहुमतलाई जिम्मेवारीका रूपमा लिँदै सुधारका काम तीव्र पार्ने प्रतिबद्धता दोहोर्याइन्।
विपक्षी दलहरूले निर्वाचन परिणाम स्वीकार गर्दै सरकारलाई रचनात्मक दबाब दिने बताएका छन्। उनीहरूले संसदमा नीतिगत बहस सशक्त बनाउने, पारदर्शिता र जवाफदेहितामा जोड दिने बताएका छन्। केही विपक्षी नेताहरूले मतदाताको सन्देश आत्मसात् गर्दै संगठन सुदृढीकरण र वैकल्पिक नीति प्रस्तुत गर्ने बताएका छन्। राजनीतिक विश्लेषकहरूका अनुसार दुई तिहाइ बहुमतले सरकारलाई ठूला संरचनात्मक सुधार, बजेट कार्यान्वयन र दीर्घकालीन रणनीतिमा निर्णय लिन पर्याप्त बल प्रदान गर्नेछ। तर, आर्थिक मन्दीको सम्भावना, जनसांख्यिकीय परिवर्तन, श्रमशक्ति अभाव र क्षेत्रीय सुरक्षा चुनौती जस्ता मुद्दामा ठोस परिणाम देखाउनुपर्ने दबाब पनि उत्तिकै रहनेछ।
अन्तर्राष्ट्रियस्तरमा पनि जापानको यो निर्वाचन नतिजालाई चासोका साथ हेरिएको छ। क्षेत्रीय स्थिरता, व्यापारिक सहकार्य र कूटनीतिक निरन्तरतामा जापानको भूमिकाले निरन्तरता पाउने अपेक्षा गरिएको छ। मध्यावधि निर्वाचनमा प्रधानमन्त्री सनाए तकाइचीको नेतृत्वमा सत्ताधारी दलले प्राप्त गरेको दुई तिहाइ बहुमत जापानी राजनीतिमा महत्वपूर्ण मोडका रूपमा हेरिएको छ। अब सरकारको प्राथमिकता जनअपेक्षा अनुरूप नीतिहरूलाई प्रभावकारी रूपमा कार्यान्वयन गर्नु रहनेछ।
