काठमाडौं : नेपाल सरकारको पछिल्लो निर्णयसँगै सेयर बजार सञ्चालन समयबारे नयाँ बहस सुरु भएको छ। सरकारले शनिबारसँगै आइतबार पनि सार्वजनिक बिदा दिने निर्णय गरेपछि सेयर बजारको कारोबार तालिकामा परिवर्तन हुने भएको हो। हालसम्म हप्तामा पाँच दिन सञ्चालन हुँदै आएको सेयर बजार अब चार दिन मात्रै खुल्ने सम्भावना देखिएको छ। सरकारी बिदा बढेसँगै आइतबार बजार स्वतः बन्द हुने निश्चित भइसकेको छ भने शुक्रबार बजार खोल्ने विषयमा निर्णय गर्नुपर्ने अवस्था आएको छ।
नेपाल स्टक एक्सचेञ्ज (नेप्से) का अधिकारीहरूका अनुसार, विगतमा पनि यस्तै अवस्थामा शुक्रबार बजार खोलेर आइतबार बन्द गरिएको उदाहरण रहेको छ। त्यसैले यसपटक पनि शुक्रबार कारोबार खुला गर्ने विषयमा सञ्चालक समितिमा छलफल भइरहेको जनाइएको छ। यदि शुक्रबार बजार खोल्ने निर्णय गरियो भने सेयर कारोबार आइतबार बन्द हुने र शुक्रबार खुल्ने नयाँ प्रणाली लागू हुनेछ। तर, यस्तो निर्णय नभए बजार हप्तामा चार दिन मात्रै सञ्चालन हुने निश्चित छ। सरकारको निर्णयसँगै लगानीकर्ता तथा बजार सहभागीहरू नयाँ कार्यतालिकाको पर्खाइमा रहेका छन् भने अन्तिम निर्णय नेप्से सञ्चालक समितिबाट हुने बताइएको छ।
