काठमाडौंको टोखा नगरपालिका वडा नं। ४ मा रहेको भगवती मन्दिर ओरालो क्षेत्रमा बाटो चौडा बनाउने कार्य सुरु गरिएको छ। नगरपालिकाको डोजर प्रयोग गरी उक्त सडक विस्तार गर्ने काम भइरहेको स्थानीयले जनाएका छन्। भगवती मन्दिर ओरालोबाट जाने बाटो, जुन प्रधानमन्त्री सुशीला कार्की को घरको गेट नजिकबाट गुज्रिन्छ, सो क्षेत्रमा सडक विस्तारको काम गरिएको हो। टोखा नगरपालिकाको मापदण्डअनुसार सडकको चौडाइ कायम गर्ने उद्देश्यले नगरपालिकाले डोजर प्रयोग गरी बाटो विस्तार गरेको बताइएको छ।
नगरपालिकाका अनुसार सडक विस्तार कार्य अघि बढाउँदा स्थानीय बासिन्दाको सहमति लिइएको छ। लामो समयदेखि साँघुरो रहेको उक्त बाटोमा सवारी आवागमनमा समस्या हुँदै आएकाले सडक चौडा बनाउने निर्णय गरिएको हो। स्थानीयले पनि बाटो फराकिलो भएपछि आवागमन सहज हुने विश्वास व्यक्त गरेका छन्। विशेषगरी मन्दिर जाने भक्तजन तथा स्थानीय बासिन्दालाई आवतजावतमा सहजता हुने अपेक्षा गरिएको छ। टोखा नगरपालिकाले आगामी दिनमा पनि नगरभित्रका साँघुरा सडकलाई क्रमशः मापदण्डअनुसार विस्तार गर्दै लैजाने जनाएको छ।
