नेपाल स्टक एक्सचेन्ज (नेप्से) परिसूचकमा वृद्धि भएसँगै सेयर बजारमा कारोबार रकमसमेत बढेको छ। बजार परिसूचक र कारोबार रकम दुवैमा सुधार देखिनुले सेयर बजारमा लगानीकर्ताको सक्रियता बढेको संकेत गर्छ। यद्यपि, बजारमा देखिएको सुधारले आगामी दिनमा पनि निरन्तरता पाउँछ वा पाउँदैन भन्ने विषय भने लगानीकर्ताको मनोबल, कम्पनीहरूको वित्तीय अवस्था र समग्र आर्थिक गतिविधिमा निर्भर रहनेछ।
बिहीबार नेप्से परिसूचक सामान्य अंक बढेर बन्द भएको छ। पछिल्लो ५ कारोबार दिनदेखि बढिरहेको नेप्सेले यस दिन पनि सोही क्रमलाई निरन्तरता दिएको हो। यस दिन नेप्से परिसूचक ४.५६ अंक बढेर २६२५.८२ विन्दुमा पुगेको छ। त्यस्तै, यस दिन सेन्सेटिभ इण्डेक्स १.०१ अंक बढेको छ भने फ्लोट इण्डेक्स ०.४१ अंक र सेन्सेटिभ फ्लोट इण्डेक्स ०.३४ अंक बढेको छ।
कारोबार रकमका आधारमा यस दिन कुमारी बैंक शीर्ष स्थानमा रहेको छ। सो बैंकको यस दिन २३ करोड ६१ लाख ३१ हजार रुपैयाँबराबरको शेयर कारोबार भएको छ। त्यस्तै, यस दिन अपि पावर कम्पनीको करिब २३ करोड रुपैयाँको शेयर किनबेच भएको छ भने घलेम्दी हाइड्रोको कारोबार रकम साढे १८ करोड रुपैयाँ नाघेको छ।
नेप्सेमा हुने उतारचढावले लगानीकर्ताको मनोविज्ञानलाई प्रत्यक्ष प्रभाव पार्ने गर्छ। परिसूचक बढ्दा बजारप्रति सकारात्मक अपेक्षा बढ्ने र खरिदबिक्री गतिविधि तीव्र हुने सम्भावना रहन्छ।
