युक्रेनको राजधानी किएभमा बिहीवार राति भएको ठूलो रूसी मिसाइल र ड्रोन आक्रमणमा कम्तीमा २३ जनाको मृत्यु भएको छ। मृतकमध्ये चार बालबालिका समेत रहेको युक्रेनी अधिकारीहरूले जनाएका छन्। विस्फोटका कारण दर्जनौँ मानिस घाइते भएका छन्।
यस आक्रमणमा युरोपेली सङ्घ (EU) को प्रतिनिधिमण्डलको कार्यालय पनि क्षतिग्रस्त भएको छ। युरोपेली सङ्घको कार्यकारी आयोगकी प्रमुख उर्जुला फोन डेर लाइअनले यस घटनाप्रति कडा आक्रोश व्यक्त गर्दै कूटनीतिक संरचनामा आक्रमण हुनु अस्वीकार्य भएको बताइन्।
यस आक्रमणलाई जुलाई महिनायता भएको सबैभन्दा घातक आक्रमण मानिएको छ। युक्रेनी सरकारका अनुसार, रूसले मिसाइल र ड्रोनमार्फत व्यापक रूपमा हमला गरेको थियो, जसलाई रोक्न युक्रेनी वायु प्रतिरक्षा प्रणाली सक्रिय गरिएको थियो। तर केही मिसाइलहरू शहरमा खस्दा भवन र आवासीय क्षेत्रमा ठूलो क्षति पुगेको छ।
अन्तर्राष्ट्रिय स्तरमा पनि यो आक्रमणको कडा आलोचना भइरहेको छ। युरोपेली सङ्घ र बेलायतले रूसी राजदूतलाई बोलाएर विरोध जनाएको छन् भने थप प्रतिबन्धको तयारी भइरहेको संकेत दिएका छन्।
